Правното лице не може да врши плаќање со пресметка доколку има блокирана платежна сметка (член 183, став 7 од Законот за платежни услуги и платни системи – ЗПУПС, „Службен весник“, бр. 90/22 и 64/24). Оваа одредба за прв пат се применува од 1 јануари 2024 година.
ВАЖНО:
Забраната се однесува како на субјектите од приватниот сектор така и на ЈАВНИТЕ ПРЕТПРИЈАТИЈА и на субјектите основани од државата (Собрание, Влада) и единиците на локалната самоуправа.
Со стариот Закон за платен промет (член 25.1), забраната за плаќање со пресметка за субјектите кои имаат блокирана сметка беше неколку години по ред одложувана.
Буџетските корисници, единките корисници и другите корисници кои имаат платежни сметки во Трезорската сметка не можат да вршат плаќање со пресметка доколку имаат блокирана платежна сметка.
Јавните здравствени установи кои имаат платежни сметки во Здравствената трезорската сметка не можат да вршат плаќање со пресметка доколку имаат блокирана платежна сметка.
Дефиниции од ЗПУПС (Закон за платежни услуги и платни системи)
- „Блокирана платежна сметка“ е платежна сметка на корисник на платежни услуги за која има евидентирано нереализиран платен налог за присилна наплата или има ист единствен даночен број, односно матичен број на граѓанинот за физички лица со сметка за која има евидентирано нереализиран платен налог за присилна наплата (член 2 став 1 точка 9);
- „Плаќање со пресметка“ e меѓусебно намирување на паричните обврски и побарувања помеѓу учесниците во платниот промет со компензација, асигнација, цесија, преземање на долг и други облици на меѓусебно намирување на обврски и побарувања. (член 2 став 1 точка 99).
Глоби
За непочитување на обврската за:
- неможноста за плаќање со пресметка доколку има блокирана платежна сметка,
со членот 218 од Законот за платежни услуги и платни системи се пропишани следните глоби:
- од 50 до 250 евра во денарска противвредност за микро трговец,
- од 250 до 750 евра во денарска противвредност за мал трговец,
- од 750 до 1.500 евра во денарска противвредност за среден трговец и
- од 1.500 до 3.000 евра во денарска противвредност за голем трговец
Покрај глобата на трговецот ќе му се изрече и прекршочна санкција, забрана за вршење дејност во траење од три месеци до две години.
Глоба во износ од 200 до 300 евра во денарска противвредност ќе му се изрече на одговорното лице кај трговецот.
Покрај глобата на одговорното лице кај трговецот ќе му се изрече и прекршочна санкција, забрана за вршење должност во траење до една година.
Линк до нов модел на Изјава и Договор за компензација, прилагодени на правната ситуација – забрането плаќање со пресметка (компензација и сл.) за слубјекти кои имаат блокирана платежна (трансакциска) сметка:
- Изјава и компензација (дадена еднострано): 2024-Pro-Agens-Izjava-za-kompenzacija-prebivanje
- Договор за компензација (двострана воља на договорните страни): 2024-Pro-Agens-Dogovor-za-kompenzacija-prebivanje
